اشعارِ ادیب
کوئی طلب نہیں ہے مرے دل میں اور اب
جتنا ملا ہے وہ بھی سنبھالا نہ جائے ہے
۔۔۔۔
سجدہ ریز ہو کہ پیئں گے لبِ کوثر میں ادیبؔ
ہاتھ میں ساقئ کوثر نے جو پیمانہ دیا
۔۔۔۔۔۔
عشق شاید ترے خمیر میں تھا
یہ تیرے ہاتھ کی لکیر میں تھا
۔۔۔۔۔۔۔
دیکھوں میں اور کی طرف تجھ میں کوئی کمی ہو جب
اور اگر کمی ہے کچھ تجھ میں کہا ں وہ مجھ میں ہے
۔۔۔۔۔۔
تیری یادوں کی سجاوٹ سے یہ آئینۂ دل
دیکھنے والوں کو گُل زارِ ارم لگتا ہے
۔۔۔۔۔۔
لوح ِ رخ پر تیرے جذبات ہیں تحریر میرے
حُسنِ تصویر میرا نفسِ قلم لگتا ہے
۔۔۔۔۔۔۔
ذکرِ فراق اصل میں ذکر وصال ہے
دنیا سمجھ رہی ہے کہ میں تم سے دور ہوں
۔۔۔۔۔۔۔۔
اک ہجر کی شب یوں بھی آئی وہ پاس بھی ہو کر پاس نہ تھا
ایسا بھی کبھی وقت آئے گا اس بات کا کچھ احساس نہ تھا
۔۔۔۔۔۔
اے چشم برس ، اتنا برس ، اتنا برس تو
اتنا کہ نظر آئیں تجھے گیسوؤں والے
۔۔۔۔۔۔۔
یا صاحبِ جود و کرم ، تم ہی سے ہے میرا بھرم
تم ہی سے ہے آقا میرے ، دل میں تڑپ ، آنکھوں میں نم
۔۔۔۔۔۔
عشق کا دعویٰ کرنے والے اپنی ہستی کو مت بھول
کون ہے ان کا سچا عاشق رب جانے یا جانے رسول