کیا مجھ سے ادا ہوں ترے حق ہادئ بر حق
کیا مجھ سے ادا ہوں ترے حق ہادئ بر حق
مقبول ہو ما تھے کا عرق ہادئ بر حق
اغیار سرافراز ہوے برمِ جہاں میں
سیرت سے تری لے کے سبق ہادئ بر حق
ہم بھول کے پیغام ترا ہوگئے رسوا
جینے نہیں دیتا یہ قلق ہادئ بر حق
ڈرتا ہوں کہیں صر صرِدوراں نہ اُڑالے
باقی ہے جو ایماں کی رمق ہادئ برحق
پا کر تری انگشتِ شہادت کا اشارہ
مہتاب کا سینہ ہُوا شق ہادئ بر حق
اللہ نے بخشی تجھے کونین کی شاہی
محکوم ترے چودہ طبق ہادئ بر حق
دیتا ہے تری سیرتِ نوریں پہ گواہی
قرآن کا ایک ایک ورق ہادئ بر حق
لاریب ہے خوں تیرے شہیدان وفا کا
جس سے ہے ضیا گیر شفق، ہادئ بر حق
تائبؔ کو زمانے کے اندھیروں سے بچالے
پیٖغامبرِ ربِّ فلق، ہادئ بر حق