لب پر نبیؐ کا اسمِ مبارک رواں ہوا
لب پر نبیؐ کا اسمِ مبارک رواں ہوا
ہر سانس فرطِ شوق سے نکہت فشاں ہوا
سمٹا ہوا تھا غارِ حرا میں جو نورِ پاک
روشن اُسی سے دہر کراں تا کراں ہوا
اس کا کلام خیر کا پیغام بن گیا
اس کا نظام امن و سکوں کا نشاں ہوا
اس کے کرم سے سروِ چراخاں ہے نخلِ درد
اس کے قدم سے دشتِ وفا، گلستاں ہوا
عقبیٰ کی منزلوں میں بھی ہوگا وہ دستگیر
آسان جس کے فیض سے کارِ جہاں ہوا
رچ بس گئیں خیال میں اُس کی لطافتیں
تائب میں بے نیازِ بہارو خزاں ہوا