میں صدقے شہر مدینے دے قربان مدینے والے دے
ٹُر پئے نے شہر مدینے نُوں مہمان مدینے والے دے
جتھے اک دن ملے فرشتیاں نوں اسیں مُڑ مُڑ اوتھے جانے آں
کنے نے اپنی اُمت تے احسان مدینے والے دے
اے زائر جا کے روضے تے کتے اُچی ساہ ناں لے بیٹھیں
رب نے قرآن چ کیتے ای اعلان مدینے والے دے
اے راہی رو رو میری وی فریاد سُناویں سوہنے نوں
جد حاصل تینوں ہوؤن گے فیضان مدینے والے دے
کی دساں شان مدینے دی جنت فردوس دے زینے دی
جبریل جیئے نے خادم تے دربان مدینے والے دے
میں تاں طیبہ دے راہیاں دے پیراں نوں چمدا رہندا ہاں
دو لفظ ایہہ شاید ناں میرے لے آن مدینے والے دے
میں نت اُڈیکاں کردا ہاں ناں جیوندا ہاں ناں مردا ہاں
خورے کد اونے صائم نوں فرمان مدینے والے دے
شاعر کا نام :- علامہ صائم چشتی
کتاب کا نام :- کلیات صائم چشتی