مخمور ہواواں نے سرکار دے دَر اُتے
مخمور ہواواں نے سرکار دے دَر اُتے
پُر نور فضاواں نے سرکار دے دَر اُتے
دُنیا چ تے کی شاید جنت چ وی ناں ہوون
جو ٹھنڈیاں چھاواں نے سرکار دے دَر اُتے
جنت اے جُھکی کی رہندی اونہاں دی سلامی نوں
کچھ ایسیاں تھاواں نے سرکار دے دَر اُتے
بیمارِ گنہ تائیں ہر پاسیوں گھیر لیا
رحمت تے شفاواں نے سرکار دے دَر اُتے
ہر کوئی کھڑا اوتھے لے ہنجواں دا نذرانہ
کد رُکدیاں ہاواں نے سرکار دے دَر اُتے
بخشش دے سمندر دی اک لہر ہے دھو دیندی
کی رہناں خطاواں نے سرکار دے دَر اُتے
مہراں نے زباناں دے سب ہونٹ نے بند صائم
خاموش دُعاواں نے سرکار دے دَر اُتے