ماورائے حدِ ادراک رسولِؐ اکرم
ماورائے حدِ ادراک رسولِؐ اکرم
غایت ِ کُن ، شہِ ؐ لولاک، رسولِ ؐاکرم
تیری رحمت کی بدولت ، تری نسبت کے طفیل
خاک ہے روکشِ افلاک رسولِؐ اکرم
ستِم دہر میں ہے حرفِ تسلّی تیرا
مرہم سینہ صد چاک رسولِؐ اکرم
زیست کے دَرد و الم کی کوئی قعت ہی نہیں
آخرت ہو جو طرب ناک رسولِؐ اکرم
زہرِعصیاں کا اثر ہوتا ہے جس سے زائل
یاد تیری ہے وہ تریاق رسولِؐ اکرم
تیرا جلوہ ہے ، ترادیں ہے ، ترااُسوہ ہے
طلبِ دیدہ نمناک ، رسولِؐ اکرم
سارے عالم میں تری دھوم حبیبؐ داور
ساری خلقت پہ تری دھاک رسولِؐ اکرم
حشرمیں بھی ترے پرچم کے تلے ہو تائبؔ
اس پہ بھی ہو نگہِ پاک رسولِؐ اکرم