مضموں میں جس کے حبِ شہِؐ دوسرا نہیں
مضموں میں جس کے حبِ شہِؐ دوسرا نہیں
مقبولِ بارگاہِ خدا وہ ثنا نہیں
مشکل کشائی میری سدا آپؐ نے ہے کی
دونوں جہاں میں آپؐ سا مشکل کشا نہیں
اس کو بروئے گنبدِ خضرا جھکا کے دیکھ
امّیدِ دل کا نخل جو ہوتا ہرا نہیں
غلمان و حور و قدسی و جن و بشر تمام
کس نے درِ حضورؐ پہ سر کو دھرا نہیں
ٹھہرے نہ حبِّ غیرِ نبیؐ دل کے شہر میں
یہ قبلہ گاہِ عشق ہے کوئی سرا نہیں
ارضِ مدینہ پاک پہ اک لمحے کا قیام
جاں بیچ کے بھی گر ملے سودا برا نہیں
بندہ نواز چاہیں تو دیدار بخش دیں
ورنہ نصیب اپنا تو اتنا کھرا نہیں
وافر ہیں گرچہ گلشنِ فردوس میں نِعَم
طاہرؔ نبیؐ کے شہر سے ہرگز سوا نہیں