مدحت سے ابتدا ہو، مدحت پہ انتہا
مدحت سے ابتدا ہو، مدحت پہ انتہا
وردِ زبان ہر دم جاری رہے ثنا
حاصل ہو زندگی کا مدحت کی یہ عطا
مدحت ہی ہو تمنّا ، مدحت ہو ادّعا
حی علی الثناءِ حی علی الثنا
حرفوں کا حسنِ تام یا لفظوں کا بانکپن
ترکیب ، استعارہ و تشبیہہ کی پھبن
رنگینئِ بیان یا شیرینئِ سخن
وقفِ ثنائے شاہ ہو ہر شعر ہر ادا
حی علی الثناءِ حی علی الثنا
خالق نے کیا سجایا ایوانِ نعت ہے
قرآن مشکبار شبستانِ نعت ہے
ہر اک طلیبِ قرآں دربانِ نعت ہے
عالم میں گونجتی ہوئی تاثیر کی صدا
حی علی الثناءِ حی علی الثنا
صورت پہ مہر صدقے ، سیرت پہ مہ نثار
وہ ذات ِ حق کے مظہر ، برہانِ کردگار
حسنِ محمدی ہے کونین کی بہار
داعی ہے گُل رُتوں کی ہر سمت یہ صدا
حی علی الثناءِ حی علی الثنا
الحاد کو ہے پھر سے ایماں کی احتیاج
ہے ارتیاب کو پھر ایقاں کی احتیاج
ہے دورِ بے یقیں کو عرفاں کی احتیاج
درکار ہے نگاہِ کرم بارِ مصطفٰی
حی علی الثناءِ حی علی الثنا
جاری ہے وہ ازل سے ذکرِ نبی کی رُود
روحوں میں ہے اٹھاتی یادِ نبی سرُود
تسکینِ قلب و جاں ہے یہ نغمۂ درُود
برپا ہے ہر جہاں میں اک مجلسِ ثنا
حی علی الثناءِ حی علی الثنا
وہ شانِ مصطفٰی ہے ، بس بعد از خدا
بے بس سبھی ہیں ناعِت کہتے ہیں برملا
ممکن نہیں ہے ہم سے سرکار کی ثنا
پھر بھی ظفر پکارو ہر صبح ہر مسا
حی علی الثناءِ حی علی الثنا