نہ مال اولاد دا صدقہ نہ کاروبار دا صدقہ
نہ مال اولاد دا صدقہ نہ کاروبار دا صدقہ
اسیں تے کھانے آں یارو خدا دے یار دا صدقہ
خدا رازق اے اللہ والیاں دا ایہہ عقیدہ اے
خدا دیندا اے پر دیندا اے اپنے یار دا صدقہ
لڑی چوں ٹُٹ کے دانہ ہمیشہ خاک وِچ رُلدا
لڑی مِلدی اے اللہ والیاں دے پیار دا صدقہ
مدینے والیا! محفل چوں خالی کوئی نہ جاوے
بھریں جھولی اساڈی اپنے یارِ غار دا صدقہ
بجا اے ناز اپنے نقشبندی ہون تے مینوں
ایہہ ملیا سلسلہ مینوں نبیؐ دے یار دا صدقہ
ظہوریؔ دی وی ہووے در ترے تے حاضری آقا
ترے دربار تے آواں ترے دربار دا صدقہ