نامِ خدا سے سلسلا
نامِ خدا سے سلسلا
زمزمہ درُود کا
منزل ِ ذات کا پتا
نور و ظہورِ مصطفؐےٰ
روح و رواں کی ہے صدا
صلِّ علیٰ نبیّنا
صلِّ علیٰ محمّدِ
جلوہ روئے آنجناب
ارض و سما کی آب و تاب
مطلعِ حق کا آفتا ب
آپ کی شرع مستطاب
قدرگر وجہت نما
صلِّ علیٰ نبیّنا
صلِّ علیٰ محمّدِ
مقصد ِ کن فکاں ہیں آپؐ
قائدِ مُرسلاں ہیں آپ ؐ
نیرِّ لامکاں ہیں آپؐ
رہبرِ ہر زماں ہیں آپؐ
آپؐ کا شوقِ دل کشا
صلِّ علیٰ نبیّنا
صلِّ علیٰ محمّدِ
آپؐ ہیں جوہر ِ حیات
نورِ نگاہِ کائنا ت
پیکر ِ جراَت و ثبات
موجب راحت و نجاٹ
فکرو نظر کا منتہا
صلِّ علیٰ نبیّنا
صلِّ علیٰ محمّدِ
نوعِ ذکور کے غیاث
محسنِ طبقہ اناث
خلقِ خدا کے مستغاث
آپؐ کاعزم و انبعاث
مردہ دلو ں کا حوصلہ
صلِّ علیٰ نبیّنا
صلِّ علیٰ محمّدِ
عدل کا اُن کے سر پہ تاج
عقل و خرد پہ اُن کا راج
حق نے کہا انھیں سراج
تا ابد اُن کی احتیاج
اُن پہ ہیں دو جہاں فِدا
صلِّ علیٰ نبیّنا
صلِّ علیٰ محمّدِ
آپؐ ہیں ضامنِ فلاح
شاہد اوج، انشراح
آپؐ نگاہ کی صباح
آپؐ ہی دلوں کی راح
آپؐ کا ذِ کر جانفزا
صلِّ علیٰ نبیّنا
صلِّ علیٰ محمّدِ
زیست کی راہِ سنگلاخ
اُن کے کرم سے ہے فراخ
بارور اُن سے شاخ شاخ
مہکے ہیں اُن سے کنج و کاخ
نور ہے اُن کا جابجا
صلِّ علیٰ نبیّنا
صلِّ علیٰ محمّد
آپؐ کی دلنواز یاد
کرتی ہے جسم و جاں کو شاد
دیتی ہے مدح گر کو داد
بھرتی ہے دامنِ مراد
آپؐ ہیں معدنِ عطا
صلِّ علیٰ نبیّنا
صلِّ علیٰ محمّد
جن کے سبب طلب لذیذ
زیست کی تاب و تب لذیذ
تلخی روز و شب لذیذ
علم و فن و ادب لذیذ
جن سے قدم قدم ہدٰی
صلِّ علیٰ نبیّنا
صلِّ علیٰ محمّدِ
مرسلِ خوش خبر حضورؐ
خسروِ خشک و تر حضورؐ
دہر کے چارہ گر حضورؐ
حسن ہیں سر بسر حضورؐ
رحمت حق کی اِنتہا
صلِّ علیٰ نبیّنا
صلِّ علیٰ محمّدِ
میر عجم ، شہؐ حجاز
جن پہ کھلا ہر ایک راز
جن کے غلام سر فراز
جن پہ ہے سروری کو ناز
والی کشورِ بقا
صلِّ علیٰ نبیّنا
صلِّ علیٰ محمّدِ
جسم پہ صبر کالباس
ہاتھ میں پرچمِ سپاس
شکر طراز و حق و شناس
قصرِ وجود کی اساس
مہر سپہر ارتقا
صلِّ علیٰ نبیّنا
صلِّ علیٰ محمّدِ
آپؐ بہار عرش وفرش
عزِّ و وقارِ عرش و فرش
تاب و قرارِ عرش و فرش
دار و مدارِ عرش و فرش
دیدہ دل کا مدّعا
صلِّ علیٰ نبیّنا
صلِّ علیٰ محمّدِ
آپؐ کا ہے پیام خاض
خلقِ خدا کے نام خاص
آپؐ کی بزم عام خاص
عظمت و احترام خاص
آپؐ کا مرتبہ جدا
صلِّ علیٰ نبیّنا
صلِّ علیٰ محمّدِ
روح کا اُن سے ارتباط
باعثِ فرحت و نشاط
قلب ہے آپ کی رباط
کم ہے کوئی یہ انبساط
میرے لبوں پہ ہے سدا
صلِّ علیٰ نبیّنا
صلِّ علیٰ محمّدِ
پھیلا ہُوا ہے خوانِ فیض
آتے ہیں طالبانِ فیض
پاتے ہیں ار مغانِ فیض
کہتے ہیں داستانِ فیض
لب پہ ہے سب کے مرحبا
صلِّ علیٰ نبیّنا
صلِّ علیٰ محمّدِ
عجزِ طبیعتِ حفیظ
رنگِ محّبت حفیظ
شوق و عقیدتِ حفیظ
عزتّ و شہرت ِ حفیظ
صدقہ ہے اُس جناب کا
صلِّ علیٰ نبیّنا
صلِّ علیٰ محمّدِ
سرورؐ دیں کا اتّباع
ضامنِ اوج و ارتفاع
یورشِ کرب کا دفاع
میری گراں بہا متاع
عشقِ حبیبؐ کبریا
صلِّ علیٰ نبیّنا
صلِّ علیٰ محمّدِ
کُنج مزار کا چراغ
عشقِ نبیؐ کاداغ داغ
قلب نہ کیوں ہو باغ باغ
پائے حرم کا جب سراغ
آئے نہ لب پہ کیوں صدا
صلِّ علیٰ نبیّنا
صلِّ علیٰ محمّدِ
خیر سے ان کا اتّصاف
شانِ کرم کا اعتراف
قدرتِ حق کا انکشاف
آئنہ دل کا ہو جو صاف
دیکھیے اُن کو بر ملا
صلِّ علیٰ نبیّنا
صلِّ علیٰ محمّدِ
دہر میں آپ سا رفیق
آپ سا محسن شفیق
کوئی معلمِ خلیق
کوئی بھی صاحب طریق
آیا ہے اور نہ آئے گا
صلِّ علیٰ نبیّنا
صلِّ علیٰ محمّدِ
درِّ یتیم کی دمک
پھیلی زمیں سے تا فلک
آپ کے دَرد کی دھنک
جلو ہ فشاں ہے آج تک
زمزمہ پاش ہے ہوا
صلِّ علیٰ نبیّنا
صلِّ علیٰ محمّدِ
آپ کا فیض لازوال
آپ کے حسن میں کمال
آپ کے رعب میں جمال
لاؤں کہاں سے مَیں مثال
کوئی نہیں ہے آپ سا
صلِّ علیٰ نبیّنا
صلِّ علیٰ محمّدِ
مدح سرا ہے انگ انگ
بجتا ہے دل کا جلترنگ
ناچ اٹھے فضا میں رنگ
تازہ بتازہ ہے اُمنگ
قافلہ یاد کا چلا
صلِّ علیٰ نبیّنا
صلِّ علیٰ محمّدِ
آپ ہیں تابشِ حرم
آپ ہیں نازشِ امم
کم تو نہیں یہی کرم
رہروِ حق ہیں تازہ دم
زیرِ لوائے مصطفؐےٰ
صلِّ علیٰ نبیّنا
صلِّ علیٰ محمّدِ
ذکرِ رسُول رات دن
رکھتا ہے دل کو مطمئن
جس پہ فدا ہیں انس وجِن
جس کی طلب میں سال و سن
کون ہے آپ کے سوا
صلِّ علیٰ نبیّنا
صلِّ علیٰ محمّدِ
شاہِؐ امم، جہاں پناہ
جن و بشر کے خیرخواہ
جھکتے جہاں ہیں مہر و ماہ
ہے وہ اُنھی کی بارگاہ
شاہ بھی ہیں جہاں گدا
صلِّ علیٰ نبیّنا
صلِّ علیٰ محمّدِ
آپ کی دُھوم کو بکو
آپ کی دھاک سوبسو
اہلِ زمیں کی آبرو
آپ ہیں جانِ آرزو
آپ ہیں رُوحِ التجا
صلِّ علیٰ نبیّنا
صلِّ علیٰ محمّدِ
پائے حضورؐ چھُو کے ہی
زندگی زندگی ہوئی
اُن کی زکات آگہی
قلب و نظر کی روشنی
اسوہ سیّدِ الورٰی
صلِّ علیٰ نبیّنا
صلِّ علیٰ محمّدِ