نبیوں میں سب سے افضل و اعلیٰ سلام لو
نبیوں میں سب سے افضل و اعلیٰ سلام لو
اے راہدانِ منزلِ اَسریٰ سلام لو
اے پاسبانِ حُرمتِ بطحا سلام لو
اے اپنی ذاتِ خاص میں تنہا سلام لو
آقاؐ سلام لو مرے آقاؐ سلام لو
تخلیقِ کائنات کے منشا سلام لو
بنیادِ دین و غایتِ دُنیاسلام لو
انسانیت کے دُکھ کے مداوا سلام لو
تسکینِ قلب و جانِ تمّنا سلام لو
آقاؐ سلام لو مرے آقاؐ سلام لو
بالائے دوش لے کے مصائب کا ازدحام
آیا ہوں دلِ شکستہ و بد حال و تشنہ کام
لایا ہُوں کچھ درُود کے تحفے تو کچھ سلام
اے رحمتِ مدینہ و بطحا سلام لو
آقاؐ سلام لو مرے آقاؐ سلام لو
آقا میں اپنا حالِ زبُوں کِس طرح کہوں
مُفلس ہوں بے نوا ہوں شکستہ ہوں خوار ہوں
اس بیکسی میں نذر کروں بھی تو کیا کروں
اے بیکسوں کے والی و مولا سلام لو
آقاؐ سلام لو مرے آقاؐ سلام لو