نظر تم سا نہیں آتا نظر ڈالے جہاں کوئی

نظر تم سا نہیں آتا نظر ڈالے جہاں کوئی

ِادھر کوئی اُدھر کوئی یہاں نہ اور وہاں کوئی

---

نہیں مُمکن کبھی بھی مِثل شاہِ دو جہاں کوئی

بنایا ہی نہیں رب نے تو پھر ہوتا کہاں کوئی

---

ہر اک مخلوق کی جانب ہوئے مبعوث ہیں آقا

سمجھتے ہیں سبھی کی بولیاں بولے زباں کوئی

---

خدا نے اختیار ایسا سماعت وہ عطا کی ہے

مرے سرکار سنتے ہیں پُکارے جب جہاں کوئی

---

خدا کو آپ کی تخلیق گر مقصود نہ ہوتی

زمیں ہوتی زماں ہوتا نہ ہوتا آسماں کوئی

---

اُحد کا زلزلہ رُخصت ہوا ٹھوکر لگانے سے

زمانے میں دکھا دے اِس طرح کی ایڑیاں کوئی

---

سبھی اہل فصاحت دنگ ہیں سُن کر کلام اُن کا

سُخن ہے دلنشیں ایسا نہیں جس کا بیاں کوئی

---

خدائے پاک بھی نہ جب چُھپا شاہِ مدینہ سے

تو ہوتا کس طرح سے غیب ان سے کچھ نِہاں کوئی

---

بُلندی یُوں تو اوروں کو بھی کی حق نے عطا لیکن

سِوا اُن کے نہیں ہرگز مکینِ لامکاں کوئی

---

شفاعت عاصیوں کی گر نہ فرمائیں وہ محشر میں

اماں ہرگز نہیں پائے گا کبھی بھی بے اماں کوئی

---

مرادیں لے کے جاتے ہیں سبھی شاہ و گدا اپنی

نہ ایسا در زمانے میں نہ ایسا آستاں کوئی

---

خدائے پاک جب کرتا ہے خُود مدحت پیمبر کی

ہے ممکن کب کسی سے کر سکے مِدحت بیاں کوئی

---

ہیں رہبر نعت میں مرزا فقط حسان ہی سب کے

بوصیری سعدی و جا می ہو یا کے نغمہ خواں کوئی

نظر تم سا نہیں آتا نظر ڈالے جہاں کوئی