نی سیّو جہناں دیکھے نے زلفاں دے چھلے
نی سیّو جہناں دیکھے نے زلفاں دے چھلے
زلف ماہی دے بن گئے قیدی ہو دیوانے جھلے
جہناں دیکھے نے زلفاں دے چھلّے
جگ دے ولاں چ ولے ناں جاون ، جان ماہی دے ولے
جہناں دیکھے نے زلفاں دے چھلّے
ہجر ستاوے درد جلاوے ، روون گلے گلے
جہناں دیکھے نے زلفاں دے چھلّے
ہنجواں نال ہمیشہ رکھدے ، بھر کے اپنے پلے
جہناں دیکھے نے زلفاں دے چھلّے
یار دے ناں دیاں نیت نمازاں ، چان ناں فیر مصلے
جہناں دیکھے نے زلفاں دے چھلّے
غم دے برزخ دید چ رہندے ، نہ اُتے ناں تھلے
جہناں دیکھے نے زلفاں دے چھلّے
چھڈ کے راہ دنیا دے اوہناں ، راہ ماہی دے ملے
جہناں دیکھے نے زلفاں دے چھلّے
موت نوں بھج بھج ملدے صائم ، جد ماہی سد گھلّے
جہناں دیکھے نے زلفاں دے چھلّے