اوہ گنہگاراں دے بُلّہاں تے جدوں نام حضور آجاندا اے
اوہ گنہگاراں دے بُلّہاں تے جدوں نام حضور آجاندا اے
بخشش دے بوہے کھل جاندے رحمت نوں سرور آجاندا اے
سرکار دی محفل وچہ جہڑا اوندا اے خالی نئیں مُڑدا
بھُلیاں نوں وی کملی والے دا چیتا تے ضرور آجاندا اے
محبوب خدا دی نسبت دی تاثیر نرالی ویکھی اے
بندیاں نوں اکھیاں بند کرکے ویکھن دا شعور آجاندا اے
دنیا دی محبت دے سارے لشکارے اونہوں بھل جاندے
جدے دل وچہ مدنی ماہی دی الفت دا نور آجاندا اے
دنیا دا نظارا کوئی وی چنگا نئیں لگ دا اکھیاں نوں
جدوں عاشق کملی والے دے روضے توں دُور آجاندا اے
نیویں نوں ظہوریؔ پھل لگ دا سچ آکھیا رب دے بندیاں نیں
اوہ ٹہن ہمیشہ ٹُٹ جاندے جنہاں نوں غرور آجاندا اے