راہِ حق میں جو سرِ راہ مدینہ آیا
راہِ حق میں جو سرِ راہ مدینہ آیا
ایسا محسُوس ہوا عرش کا زینہ آیا
اتنی دُوری پہ بھی یہ قرب زہے میرے نصیب
بس تصّور ہی کیا تھا کہ مدینہ آیا
اک تمنا میں برستی رہیں پہروں آنکھیں
آپؐ کی یاد میں جب یاد مدینہ آیا
آپؐ کے فکر و عمل کی یہ بلندی یہ مقام
دیکھنے والوں کو جینے کا قرینہ آیا
خواب میں تو نظرآتا ہے مدینہ لیکن
آنکھ کھولُوں تو یہ دیکھوں کہ مدینہ آیا
جانے کِس سمت لئے جاتی ہے دُنیا ہم کو
راہ میں کعبہ ملا ہے نہ مدینہ آیا
ہم نے سیکھے تو ہیں ‘ برتے نہیں آدابِ سفر
اب گلہ کیا ہے جو طوفاں میں سفینہ آیا