رسولِؐ عالمیاں، ذاتِ لم یزل کا حبیب
رسولِؐ عالمیاں، ذاتِ لم یزل کا حبیب
وہ جس کا لطف بہ ہر رنگ ہے دلوں کے قریب
وہ جس کی چشمِ کرم سب کے حال پر یکساں
فقیرہو کہ شہنشہ، امیر ہو کہ غریب
رُکے نہ راہِ وفا میں نبیؐ کے دیوانے
اگرچہ نصب ہر اک موڑ پہ تھیں داروصلیب
نبیؐ کی سیرتِ عالم فروز کا پر تو
فروغِ حُسنِ تمدّن ، تجّلیِ تہذیب
نظامِ دہر کہ فرسودہ وپریشاں تھا
مرے حضورؐ نے بخشی اسے نئی ترتیب
مرے حضورؐ نے اسرارِ زیست سمجھائے
مرے حضورؐ نے چمکائے آگہی کے نصیب
مرے حضورؐ کی رحمت ہے بیکراں تائبؔ
مرے حضورؐ کا اعلانِ عام لاَتَثرِیْب