رسول اللہ کی آمد سے اوّل
رسول اللہ کی آمد سے اوّل
طلسمِ گُمرہی ہر سُو مسلسل
گروہِ آدمی محصورِ آلام
ہوا و حرص کا حامل وہ ہر گام
حرم کے گرد وہ گمراہ سردار
طمع ، حرص و ہواؤ مکر ، کردار
عدو کی طرح محکوموں کو مارے
سلوکِ مہر سے محروم سارے
ہر اِک دلدادۂ اوہام ساحر
دلائل اور ردّ و کد کے ماہر
وہ راس المال ، دل کی سرد مہری
طمع محکم ، حسد کی سطح گہری
گلوئے عدل آسودِ سَلاسِل
ہوا ، آلودۂ سمِّ ہلا ہل
روسا مصر کے ، سردارِ مکہّ
سوادِ روم کے عمّال و امراء
سلوکِ مہر سے محروم کُرّہ
عدو ، اللہ کا آوے کا آوا
علا لا آمدِ علّامِ عالم
درودِ ہمدمِ اولادِ آدم
اِرم آرا ہوا صحرا کا موسم
سرورِ سرو ، مولودِ مکرّم
صدائے طوطئ و طاؤس و طائر
وہ آئے دادرس ، آئے وہ داور
سواری احمدِ مرسل کی آئی
وہ اُمی اور وہ معصوم داعی
وہ محکوموں کا حامی اور مددگار
وہ محکوموں کا ہمدم اور روادا ر
وہ اُمّی اور وہ اُمّ الکلامی
کرے اللہ سے وہ ہم کلامی