روشن ہوا تھا غارِ حِرا کل کی بات ہے
روشن ہوا تھا غارِ حِرا کل کی بات ہے
سارا جہاں چمکنے لگا، کل کی بات ہے
چلتے تھے سر اُٹھا کے زمیں پر غریب لوگ
چھوٹا بڑا کوئی بھی نہ تھا، کل کی بات ہے
گردِ سفر سے جس کی کھلے روشنی کے پھول
وہ قافلہ زمیں پہ رُکا، کل کی بات ہے
خوشبو برس رہی تھی کسی کے وجود کی
مہکی ہوئی تھی ساری فضا، کل کی بات ہے
اُڑتے تھے نَور بن کے چمکتے ہوئے حروف
ہونٹوں کو چُومتی تھی دُعا، کل کی بات ہے
گُم صُم کھڑے ہیں سوچ میں سب آسماں کے لوگ
اِک واقعہ عظیم ہوا، کل کی بات ہے
انجؔم نہ تھا کسی کو کسی سے کوئی گِلہ
بھوکا زمیں پہ کوئی نہ تھا، کل کی بات ہے