روضۂ سرکارؐ رشکِ مطلعِ فاران ہے
روضۂ سرکارؐ رشکِ مطلعِ فاران ہے
ان کے گنبد پر چہکتا عندلیبِ جان ہے
پختگی مضمر عقائد کی ہے اس معیار میں
حبِ شاہِؐ دو جہاں پیمانۂ ایمان ہے
ہو مرے بختوں میں بوسہ آپؐ کے نعلین کا
مدّتوں سے میرے دل میں حسرت و ارمان ہے
جن و انس و قدسی و غلماں ہیں سائل آپؐ کے
آپؐ کا دریوزہ گر ہر دور کا سلطان ہے
سرورِؐ کونین کی سیرت ہے علم و معرفت
وصف ہر اک آپؐ کا اک معدنِ عرفان ہے
متن اس کا مستنیر اذکار سے ہے آپؐ کے
آپؐ کی توصیف میں نازل ہوا قرآن ہے
قسمتِ نوعِ بشر تبدیل کی ہے آپؐ نے
آپؐ کی تہذیب ہی سے زینتِ انسان ہے
ہے اطاعت حق کی لازم طاعتِ سرکارؐ بھی
حشر میں اعمال کی بس اک یہی میزان ہے
مرحبا طاہرؔ ہے بیٹھا ان کے دستر خوان پر
کس قدر خوش بخت ہے جو آپؐ کا مہمان ہے