رحمت ذوالجلال
رحمت ذوالجلال
قدسیوں کا جمال
بیکراں بے مثال۔۔۔۔۔ م ح م د
۔۔
آسمانوں سا قد
صبح جیسا وجود
پس بھی پیش آفریں
غیبٗ اصل شہود
جس کی چپ بھی خطیب
جس کا دکھ بھی طبیب ۔۔۔۔ آبروئے کمال
م ح م د
۔۔۔
جس کے دربار میں
حکم ِ قرآں چلے
جس کی رفتار میں
نبضِ دوراں چلے
رنگ پانی کو دے
زندگانی کو دے ۔۔خوبصورت مآل
م ح م د
۔۔
دھڑکنوں میں سنوں
اسکے قد موں کی چاپ
اک اچٹتی نظر
دھوئے عمروں کے پاپ
دیدِ حق جس کی دید
وقت جس کا مرید ۔۔۔ جس کا فردا بھی حال
م ح م د
۔۔
صبر اس کی اساس
فقر اس کا لباس
ہاتھ خالی مگر
دو جہاں اسکے پاس
اس کے فاقے رئیس
غم زدوں کا انیس۔۔۔۔ تہی دستوں کا مال
م ح م د
۔۔
جھوم اٹھے عرش بھی
جب تشّہد پڑھے
صحنِ فردوس میں
وہ تہجد پڑھے
حق نما حق جواز
عشق جسکی نماز ۔۔۔حُسن جس کا خیال
م ح م د
۔۔
شاخ گل دے گیا
تازیانے کے ساتھ
فقر بھی رکھ دیا
ہر خزانے کے ساتھ
جب ہوں دکھ سامنے
آئے وہ تھامنے ۔۔۔ ہجر جس کا وصال
م ح م د
۔۔
کبریا کا مُرید
انبیا کا امام
اس پہ لاکھوں درود
اس پہ لاکھوں سلام
اس کا وعدہ یقیں
اسکی چاہت بھی دیں ۔۔۔ شرحِ دیںٗ اس کی آل
م ح م د