رشتۂِ عشق و عقیدت ارفع و اعلیٰ سے جوڑ
رشتۂِ عشق و عقیدت ارفع و اعلیٰ سے جوڑ
ناسمجھ سمجھے گا کب دل کو شہِ بطحا سے جوڑ
رشتۂِ عشق و عقیدت ارفع و اعلیٰ سے جوڑ
ناسمجھ سمجھے گا کب دل کو شہِ بطحا سے جوڑ
دربدر بھٹکے گا کب تک عصرِ حاضر آ اِدھر
تارِ ہستی ہادیِ دینِ مبیں آقا سے جوڑ
زندگی میں پھر خزاں کی رُت نہ آئے گی کبھی
گلشنِ دل کو بہارِ گنبدِ خضرا سے جوڑ
حشر کے دن جب سوا نیزے پہ ہوگا آفتاب
کام آئے گا یہی، رشتہ شہِ والا سے جوڑ
ہر قدم پر کامیابی تیرے چومے گی قدم
سرخ رو ہونا ہے تو دل گنبدِ خضرا سے جوڑ
چاہتا ہے تو اگر نارِ جہنم سے نجات
رشتۂ دل شبّر و شبّیرکے نانا سے جوڑ
دیکھ پھر بینائی کیسے کام کرتی ہے شفیقؔ
اپنی آنکھوں کو ابھی تو ان کی خاکِ پا سے جوڑ