سدناں حضور کدوں ایس گنہگار نوں
سدناں حضور کدوں ایس گنہگار نوں
کدوں اَساں ویکھنا مدینے دی بہار نُوں
ورهدا مدینے وچ ہر ویلے نور اے
ہر پاسے طیبہ وچ سوہنے دا ظہور اے
مِل دا قرار اوتھے ہر بے قرار نوں
رحمتاں دا بحر طیبہ پاک چ رواں ایں
مل جاندی عاصیاں نوں طیبہ چ امان ایں
در اُتے آیاں دی اے لاج سرکار نوں
طیبہ وچ ہر اک چیز جچی ہوئی اے
گلیاں وچ زلفاں دی مہک رچی ہوئی اے
اکھیاں چ کدوں پاؤناں طیبہ دے غُبار نُوں
طیبہ وچ ہر پاسے رب دی تجلیٰ اے
طیبہ وچ الله دا حبیب اللہ اللہ اے
سینے ہے مدینے لایا جہدے انوار نوں
خلق نوں بچایا ہویا جس دے وجود نے
اوہدی پاک ذات آتے لکھاں ہی درود نے
لکھاں نے سلام نالے اوس دے مزار نُوں
رحم اوتھے کیتا جاندا ہر خطا کار تے
واجب اے بہشت ہندا ہر گنہگار تے
ویکھنا تے ویکھ اوتھے مصطفیٰ دے پیار نوں
صائم اُتے سوہنا جدوں رحم فرماوے گا
عاصی گنہگار نوں جاں روضے تے بلاوے گا
توڑاں ناں میں شالا اودوں ہنجواں دی تارنوں