صاحِبِ شان و ذی وقار حضور
صاحِبِ شان و ذی وقار حضور
جو ہیں محبوبِ کِردگار حضور
غمزدوں کے ہیں غمگُسار حضور
بے قراروں کے ہیں قرار حضور
میں گُناہوں پہ شرمسار حضور
ہے کرم آپ کا شِعار حضور
لامکاں کے مکین ہیں آقا
عرش سے بھی گئے ہیں پار حضور
آپ محبوبِ کبریا ٹھہرے
جان و دل آپ پر نثار حضور
نامداروں میں نام ہے اُونچا
تاجداروں کے تاجدار حضور
کردیا غیب حق تعالیٰ نے
آپ پر سب ہی آشکار حضور
سخت بیمار ہُوں گُناہوں کا
دو شِفا بہرِ چار یار حضور
بات اپنی بِگاڑتا ہُوں میں
اور بناتے ہیں بار بار حضور
حشر میں لاج آپ ہی رکھنا
ہے گُناہوں کا سر پہ بار حضور
منہ خِزاں کا نہ عمر بھر دیکھوں
وہ عطا کیجئے بہار حضور
وہ کرم کیجئے دمِ آخر
میرے لب پر ہو بار بار حضور
وہ مسلمان خُلد پہنچے گا
آپ سے جس کو ہوگا پیار حضور
ہو نظر اپنے سب غلاموں پر
سارے ہوجائیں دیندار حضور
اپنے مرزا پہ ہر گھڑی رکھنا
رحمتیں اور اپنا پیار حضور