سانوں دسو ڈر کاہدا طوفاناں دا
سانوں دسو ڈر کاہدا طوفاناں دا
کملی والا راکھا ساڈیاں جاناں دا
محفل پاک نبی دی سدا سجاواں گے
نعرے سدا رسالت والے لاواں گے
سدا کراں گے ذکر نبی دیاں شاناں دا
کملی والا راکھا ساڈیاں جاناں دا
آمنه دی جد گود چہ سوہنا آیا سی
جد دھرتی تے قدم مبارک لایا سی
ہو گیا نینواں سر سارے آسماناں دا
کملی والا راکھا ساڈیاں جاناں دا
واہ حلیمہ تیری شان نرالی اے
ڈھاری تیری کنی بھاگاں والی اے
جس وچ بیٹھا مالک کُل مکاناں دا
کملی والا مالک ساڈیاں جاناں دا
چنگے رب نے اپنے ذمے لائے نے
ساڈے ورگے نبی نے جھولی پائے نے
ڈر ہُن کاہدا حشر دیاں میداناں دا
کملی والا راکھا ساڈیاں جاناں دا
کویں کہواں میں پاک نبی دا بردا ہاں
نسبت کر دیاں نال اوہدے میں ڈردا ہاں
میں منگتا اوہ شاہ سارے سُلطاناں دا
کملی والا راکھا ساڈیاں جاناں دا
صائم غاراں دے وچ سوہنا روندا سی
ہنجواں دے نال عیب اساڈے دھوندا سی
مُل کی پایا اَساں اوہدے احساناں دا
کملی والا راکھا ساڈیاں جاناں دا