شہر نبیؐ کے منبر و مینار چُومنا
شہر نبیؐ کے منبر و مینار چُومنا
جی بھر کے سارے کوچہ و بازار چُومنا
پڑھنا نماز مسجدِ نبویؐ کے صحن میں
سجدے میں جا کے فرش کی مہکار چُومنا
دونوں جہاں میں جس کی نہیں ہے کوئی مثال
اُس سرزمینِ خُلد کے انوار چُومنا
پیڑوں کی شاخ شاخ سے ملنا برنگِ ابر
پیڑوں کی شاخ شاخ کے اثمار چُومنا
رکھنا نہ اپنے آپ کو محرومِ التفات
ہر نقشِ لازوال کے رُخسار چُومنا
ہر اک الاپتا ہے وہاں نغمۂ درُود
ہر طائرِ جمال کی منقار چُومنا
انجؔم تجھے ہو اُن کی زیارت اگر نصیب
پلکوں سے اُن کے نُور کی دستار چُومنا