شمس الضحیٰ کہوں تجھے بدر الدُّجیٰ کہوں
شمس الضحیٰ کہوں تجھے بدر الدُّجیٰ کہوں
نور الہدیٰ کہوں تجھے کہف الوریٰ کہوں
آقا کہوں کہ حاکم و فرماں روا کہوں
ہادی کہوں کہ مالکِ ارض و سما کہوں
شاہِ دنیٰ کہ مظہرِ ذاتِ خدا کہوں
یا پھر تجھے میں شافعِ روزِ جزا کہوں
جن سے ہوئی ہے دہر کی وہ ابتدا کہوں
بھیجے گئے جو بعد میں وہ انتہا کہوں
آقا کہوں کہ سرورِ ہر دوسرا کہوں
شاہِ رُسل کہوں یا شہِ انبیا کہوں
باغِ خلیل کا گلِ رنگیں ادا کہوں
جانِ بَہار، جانِ چمن، خوش ادا کہوں
محبوبِ رب کو دافعِ رنج و بلا کہوں
ان کے لُعابِ پاک کو جانِ شفا کہوں
مختارِ کائنات کو جانِ وفا کہوں
ان کی رضا کو رب کی رضا برملا کہوں
ان کی سخاوتوں کو برستی گھٹا کہوں
ان کے فیوض و لطف کو موجِ عطا کہوں
آسان مشکلات کو کرتے ہیں آپ ہی
سارے جہاں کا آپ کو حاجت روا کہوں
تسبیحِ لب پہ نام محمّد کا ورد ہو
اے کاش اٹھتے، بیٹھتے صلِّ علیٰ کہوں