سوہنا آیا تے جہان سارا سجدا گیا
سوہنا آیا تے جہان سارا سجدا گیا
بُھکھا جتھے وی سی کوئی اوتھے رَجدا گیا
آیا آمنہ دا لال لَے کے رحمتاں نوں نال
بُوہا کافراں دے کُفر والا وجدا گیا
شان عید دی ضرور لے کے نسبت حضور
ودھ سارے دناں نالوں دِن اَج دا گیا
رکھے پیر جیہڑی تھاں کرے کملی دی چھاں
سوہنا عاصیاں دے عیب سارے کجدا گیا
لایا مُنکراں نے زور پایا جِناں بہتا شور
اوہدے نام دا نقارہ ہور وجدا گیا
کُفر ہندا گیا زیر اوہدا علی مولا شیر
جیہڑے پاسے وی میدان وِچ گجدا گیا
آیا رب دا جاں نور ہویاں ظُلمتاں سی دُور
ول غاراں دے شیطان ہیسی بھج دا گیا
سوہنے آقا نے سی آن کیتے لوک اک جان
فرق مٹک سارا چج تے کُوچج دا گیا
جہنوں نبی مختار ویکھ لیا اک وار
اوہدے پیار دی زنجیر وچ بجھدا گیا
آیا طیبہ دا خیال دُکھ دِتے سوہنے ٹال
نالے مل سی ثواب پورے حج دا گیا
صائم عاصی نے ضرور سدا کیتے سی قصور
لج پال مان رکھدا بے لج دا گیا