تابع ہے تِرا رستۂِ فردوس کا راہی
تابع ہے تِرا رستۂِ فردوس کا راہی ، اے آمِر و ناہی
مُنکِر ہے تِرے حُکم کا مَحصورِ تباہی ،اے آمِر و ناہی !
ہے ہاتھ تِرا دستِ خدا ، اور تِرا کام ، اللّٰہ کا ہوا کام
اور قول ہے مِن جُملۂِ اَقوالِ الٰہی ، اے آمِر و ناہی !
معراجِ تَخَیُّل تِرے قدمین کی یادیں ، نعلین کی باتیں
دَستارِ تَکَلّم ہے ترا حرفِ ثنا ہی ،اے آمِر و ناہی !
ضَو دِن نے تِرے چہرۂِ وَالشمس سے پائی ،اے نورِ خدائی !
لِی گیسوئے وَاللیل سے راتوں نے سیاہی، اے آمِر و ناہی !
حرفوں کا بیاباں ہے گُلِ نعت سے گلشن ،اور کِھلتا ہوا فن !
ورنہ تو مہکتی نہ یوں گفتار کَمَا ھِی ، اے آمِر و ناہی !
ہے شرع سے ثابت کہ تُو تَکویں میں ہے مُختار،اے نائِبِ غَفّار !
اور صاحبِ تَحکیمِ مُباحات و مَناہی، اے آمِر و ناہی !
ما قبل نبی اس لیے آئے تھے مُقَدَّم اور تُو ہوا خاتَم
تُو صاحبِ دیدار ، وہ اَصحابِ گواہی ،اے آمِر و ناہی !
دیکھیں گے تِرے مَوقفِ محمود کی رِفعت،اور اوجِ شفاعت
مانیں گے تجھے حشر میں سب خواہی نخواہی ،اے آمِر و ناہی !
تُو مُثبِتِ حَسنات ہے ، مِعمارِ مَعابِد ،اے جانِ مقاصِد !
تو نافیِٔ آلاتِ خرافات و مَلاہی، اے آمِر و ناہی !
کِیں ہم نے جو ہر لمحہ خطاؤں پہ خطائیں ،بنتی تھیں سزائیں
تو نے ہے مگر ہم سے بَہ اِنعام نباہی، اے آمِر و ناہی !
قربان تِری مُنکَسِری پر ہوئی خلقت ، ہوتے ہوئے قدرت
تو نے ہے چُنا فَقر کو ، ٹُھکرائی ہے شاہی، اے آمِر و ناہی !
کیا خوب تِرا حسن ہے اے جلوۂ وحدت ،خَلقت تو ہے خلقت
تجھ سے تو مُلاقات ہے خود رب نے بھی چاہی، اے آمِر و ناہی !
دشمن کو بھی دیوانہ کرے تیرا تبسُّم ،اور حُسنِ تَکَلّم
خالِق نے تِری خوبیِٔ اَخلاق سَراہی، اے آمِر و ناہی !
اے مالکِ فردوس ! یہ تیرا ہی کرم ہے ،اتنا تو بھرم ہے
گو لائقِ دوزخ ہوں مگر ہوں تو تِرا ہی، اے آمِر و ناہی !
مَبعوث ہوا بن کے مُعَلِّم تو جہاں کا ،مرکز ہے اَماں کا
سیرت ہے فقط تیری فلاحی و رِفاہی، اے آمِر و ناہی
کیوں خوف رکھے سازشِ اَعدا سے، بلا سے،جب فضلِ خدا سے
حاصل ہے معظمؔ کو تری پُشت پناہی، اے آمِر و ناہی