ترے دَربار کے جبریل دَرباں یَارَسُوَلَ اللہ
ترے دَربار کے جبریل دَرباں یَارَسُوَلَ اللہ
تری سرکار کے خادم ہیں رِضواں یَارَسُوْلَ اللہ
ہزاروں ناظرہ پڑھ پڑھ کے حافظ ہوگئے اس کے
تمہارا مُصْحَفِ رُخ ہے کہ قرآں یَارَسُوْلَ اللہ
تری سیرت نے لاکھوں بت پرستوں کو کیا مومن
تری صورت دَوائے دَرد منداں یَارَسَُوْلَ اللہ
دُرِ دَندانِ اَقدس کی جھلک کا ایک پرتو ہے
جو ہیں اَفلاک پر اَنجم درخشاں یَارَسَُوْلَ اللہ
مصیبت دور بھاگے مشکلیں آساں ہوں فوراً
پکارے جو کوئی تم کو مسلماں یَارَسُوْلَ اللہ
ترا اِک قطرئہ دَریائے رَحمت سرخرو کردے
گناہوں نے کیا بے حد پشیماں یَارَسُوْلَ اللہ
شہید کربلا کی پیاس کا صدقہ برس جائے
سیہ کاروں پہ تیرا اَبرِ نیساں یَارَسُوْلَ اللہ
اَثر کیوں کر کرے گی آفتابِ حشر کی گرمی
مرے سر پر تو ہوگا تیرا دَاماں یَارَسُوْلَ اللہ
تجھے دیکھوں تیرے یاروں کو دیکھوں اور ترے رب کو
مجھے ہو عید گہ محشر کا میداں یَارَسُوْلَ اللہ
قیامت میں مدد کرنا مری اے شافع محشر
بجز تیرے وہاں ہے کون پرساں یَارَسُوْلَ اللہ
براتی ساتھ ہوں دولہا کے جب میدانِ محشر میں
تو اس میں میں بنوں تیرا ثناخواں یَارَسُوْلَ اللہ
خریداروں میں اس عاصی کو بھی فرمائیے شامل
کھلے جب حشر میں رحمت کی دُ ّکاں یَارَسُوْلَ اللہ
اَجل نزدیک ہے اُس سبز گنبد کی زِیارت کا
کہیں دِل ہی میں لیجاؤں نہ اَرماں یَارَسُوْلَ اللہ
سنہری جالیوں کے سامنے گر میرا دم نکلے
مُیَسَّر ہو مجھے لطفِ فراواں یَارَسُوْلَ اللہ
جو منکر ہیں وہ جلتے ہیں نبی کے نامِ نامی سے
پکارا کرتے ہیں ہر دَم مسلماں یَارَسُوْلَ اللہ
جمیلِؔ قادری دَربارِ حق میں پیش ہو جس دم
تو کہہ دینا یہ ہے میرا ثنا خواں یَارَسُوْلَ اللہ