تری بات بات ہے معجزہ
تری بات بات ہے معجزہ ترا لمحہ لمحہ مثال ہے
میں فقیرِ مرگ و حیات ہوں تری اک نظر کا سوال ہے
تری زندگی بھی عجیب ہے تو امیر ہے کہ غریب ہے
ترا پائے ناز ہے عرش پر ترے بازوؤں میں کدال ہے
ترا سکّہ بن کے چلا کروں تری خیر پر میں پلا کروں
ترا عشق ہے مرا مال و زر ٗ مرا رزق تیرا خیال ہے
ترا علم علم کی انتہا تری عقل عقل سے ماورا
تو ہے صدر محفلِ انبیاء ترا دین دین کمال ہے
تو بلندیوں سے بلند تر تو بشر ہے ہم سا نہیں مگر
تری رہگزر بھی ہے آسماں ترا نقش پا بھی ہلال ہے
تجھے دیکھ دیکھ کے میں جیوں تجھے تھام تھام کے میں چلوں
تو ہے آئنہ میں ہوں حیرتیں ٗ میں نگاہ ہوں تو جمال ہے
مجھے روزِ حشر کا غم نہیں تری اک نگاہ بھی کم نہیں
تو ہی سر پرست شروع ہے تو ہی اعتبار مآل ہے