تِری خُوشبو مِری چادر
تِری خُوشبو مِری چادر
تِرے تیور مِرا زیور
تِرا شیوہ مِرا مسلک
وَرَفَعْنَالَکَ ذِکْرَک
مری منزل تِری آہٹ
مِرا سِدرہ تِری چو کھٹ
تِری گاگر
مِرا ساگر
تِرا صحرا مِرا پنگھٹ
میں ازل سے تِرا پیاسا
نہ ہو خالی مِرا کاسہ
تِرے واری تِرا بالک
وَرَفَعْنَا لَکَ ذِکْرَک
تِری مِدحت
مِری بولی
تو خزانہ میں ہوں جھولی
تِرا سایہ
مِری کایا
ترا جھونکا مِری ڈولی
تِرا رستہ مِرا ہادی
تِری یادیں مِری وادی
تِرے ذرّے مِرے دیپک
وَرَفَعْنَا لَکَ ذِکْرَک
تِرے دم سے دِلِ بِینا
کبھی فاراں کبھی سِینا
نہ ہوں کیوں پھر
تِری خاطر
مِرا مرنا مِرا جینا
زمیں بھی ہو فلک سی
نظر آئے جو دھنک سی
تِرے دَر سے مِری جاں تک
وَرَفَعْنَا لَکَ ذِکْرَک
میں ہوں قطرہ تو سمندر
مِری دُنیا تِرے اندر
سگِ داتا
مِرا ناتا
نہ ولی ہوں نہ قلندر
تِرے سائے میں کھڑے ہیں
مِرے جیسے تو بڑے ہیں
کوئی تجھ سا نہیں بیشک
وَرَفَعْنَالَکَ ذِکْرَک
میں ادھُورا تو مکمّل
میں شکستہ تو مُسلسل
میں سخنور
تُو پیمبرٔ
مِرا مکتب تِرا اِک پل
تِری جنبش مرا خامہ
تِرا نقطہ مِرا نامہ
کیا تو نے مجھے زیرک
وَرَفَعْنَا لَکَ ذِکْرَک
مری سوچیں ہیں سوالی
مِرا لہجہ ہو بلالی
شب تِیرہ
کرے خِیرہ
مِرے دن بھی ہوں مثالی
تِرا مظہر ہو مِرا فن
رہے اُجلا مِرا دامن
نہ ہو مجھ میں کوئی کالک
وَرَفَعْنَا لَکَ ذِکْرَک