ترےؐ دم سے کونین میں ہے اُجالا
ترےؐ دم سے کونین میں ہے اُجالا
ہمیں ظلمتوں سے ہے تو نے نکالا
تراؐ ذکر ارفع کیا ہے خدا نے
ہمیشہ رہے گا تراؐ بول بالا
حلیمہؓ نے پالا ، مگر در حقیقت
نبیؐ نے حلیمہؓ کے کنبے کو پالا
پکارا ہے شاہِؐ مدینہ کو ہم نے
پڑا جب کسی بھی مصیبت سے پالا
وہی سرخرو ہو گیا جس نے خود کو
نبیؐ کی اطاعت کے سانچے میں ڈھالا
کرے التجا وہ شہِ دوسراؐ سے
گناہوں نے جس کو مصیبت میں ڈالا
اگر داغِ عشق محمدؐ ہے دل میں
لحد میں رہے گا ہمیشہ اُجالا
سکت نعت کی گر نہیں ہے زباں میں
تو ہونٹوں پہ ڈالوں خموشی کا تالا
کرے گا نچھاور درِ مصطفیٰؐ پر
پروتا ہے اشفاقؔ لفظوں کی مالا