تم سے کیفِ حضوری بیاں کیا کروں
جا کے بطحا میں قلب اور جاں کھُو گئے
رُوح پر وَجد کچھ ایسَا طاری ہوا
اپنی ہستی کے سارے نشاں کھُوگئے
بے طلب ہی مُرادوں سے دامن بھرا
چار جانب تھا اِک بحرِ جُود و سَخا
جب خموشِی ہی بننے لگی مُدّعا
پھِر تو الفاظ ونطق و بیاں کھو گئے
جب نگاہیں اُٹھیں سوئے بابُ السّلام
چھَا گیا رُوح پر ایک کیف تمام
آگیا بر لبِ دِل دُرود و سَلام
میری نظروں سے کون و مکاں کھو گئے
مسجدِ پاک میں جب جبیں جھُک گئی
فخر بہزؔاد کرنے لگی بندگی
کیا بتائیں ہمیں کیسی لذّت ملی
اُن کا نقشِ قدم تھا جہاں کھو گئے
شاعر کا نام :- بہزاد لکھنوی