اُمیدیں لاکھ ٹو ٹیں تم کرم پر ہی نظر رکھنا
اُمیدیں لاکھ ٹو ٹیں تم کرم پر ہی نظر رکھنا
یہ ان کا کام ہے اپنے غلاموں کی خبر رکھنا
تلاش نقشِ پائے سرورِ دیں عمر بھر رکھنا
جو مل جائیں تو پھر ان پر جبیں اپنی وہیں شام و سحر رکھنا
بس اتنا مختصر اس راہ میں زادِ سفر رکھنا
تمنّا دل میں رکھنا اور پلکوں پر گُہر رکھنا
محیط ان کی سماعت ہے زباں پر بھی مکاں پر بھی
تو پھر یہ بار منّت کیوں صباء کے دوش پر رکھنا
خداوند! وَرَفَعْنَا لَکَ ذِکْرَکْ کے صدقے میں
ثناخوانوں میں ان کے روزِ محشر معتبر رکھنا
ادب کا بھی تقاضا ہے محبت کا بھی شیوہ ہے
زباں خاموش پلکیں آنسوؤں سے خوب تر رکھنا
سفینہ ہے ادیبؔ خستہ جاں ہے موجِ طوفاں ہے
اب اس کی آبرو طوفاں میں شاہِ بحر و بر رکھنا