یا سیدِ ابرار تِرا موئے مبارک
یا سیدِ ابرار تِرا موئے مبارک
کیا خوب ہے خمدار تِرا موئے مبارک
لہراتے ہیں ہر شام و سحر نور کے چشمے
ہے بحرِ پُر انوار تِرا موئے مبارک
ہر سال ہوا کرتا ہے شاخوں میں اضافہ
بڑھ جاتا ہے ہر بار تِرا موئے مبارک
وہ جنگ کا میداں ہو کہ آقا کوئی مشکل
بنتا ہے مددگار تِرا موئے مبارک
ملتا ہے سکوں دل کو تو اِن آنکھوں کو ٹھنڈک
دیکھوں جو میں ہر بار تِرا موئے مبارک
ہم اہلِ سنن کے لئے ہے ایک تبرک
یا احمدِ مختار تِرا موئے مبارک
یہ حضرتِ طلحہ کے وسیلے سے ملا ہے
رکھتا ہے جو سنسار تِرا موئے مبارک
سرکار عجب کیا ہے کہ پا جائے شفا بھی
جو دیکھ لے بیمار تِرا موئے مبارک
اُس پار فضا ہے تِری خوشبو سے معطر
مہکاتا ہے اِس پار تِرا موئے مبارک
تو رحمتِ عالم کے تنِ پاک کا حصہ
ہم کرتے ہیں اقرار تِرا موئے مبارک
بھولے سے بھی پہنچائے جو تجھ کو کوئی ایذا
ہو گا وہ گنہگار تِرا موئے مبارک
رکھتا ہی نہیں ہے یہ شفیقؔ اُن سے تعلق
جو کرتے ہیں انکار تِرا موئے مبارک