زائر جو بھی شہرِ مدینہ اپنے گھر سے جاتے ہیں
زائر جو بھی شہرِ مدینہ اپنے گھر سے جاتے ہیں
دل اپنا اُن کی چوکھٹ پر رکھا چھوڑ کے آتے ہیں
شاہ و گدا جو سائل بن کر آپ کے در پر جا پہنچے
اُس در سے وہ سارے بھکاری جھولیاں بھر کر لاتے ہیں
در قاسم کا وا ہے جب تو اور کسی سے کیوں مانگیں
لوگوں کے دامن میں خزانے ، آپ کے در سے آتے ہیں
لفظِ قُم سے حضرتِ عیسٰی ، مُردے زندہ کرتے ہیں
جانِ مسیحا مُردے ہی کیا ، پتھر سے بُلواتے ہیں
حرفِ مُشدّد کی مانند ، وہ دونوں جانب واصل ہیں
ہاتھ پکڑ کر بندوں کا وہ اللہ سے مِلواتے ہیں
اُن کی نگاہِ لطف و کرم میں، جو آیا شہکار ہوا
دیکھ لیں جس کو ایک نظر سے تو سردار بناتے ہیں
مومن کو ہے اُلفت تُجھ سے ، بُغض مُنافق رکھتے ہیں
سوچ ذرا یہ سرورِ عالَم حیدر سے فرماتے ہیں
نام جلیل اُن ہی کا ہر دم ، اپنے لب پر رہتا ہے
نوکر سے جو قبر تا محشر ، ہر جا ساتھ نبھاتے ہیں