اے خوشا یومِ شوکتِ اِسلام
اے خوشا یومِ شوکتِ اِسلام
مرحبا کاروانِ جوشِ دوام !
انبساط ِ جنوں ہے مرگِ خرد
رہروِ شوق کو بقائے دوام !
موجِ ایماں تڑپ تڑپ اُٹھّی
فرش تو فرش عرش زیرِ دام !
قصرِ احمر پہ ہے یہ ضربِ کلیم
لا اِلٰہ کی صَد ا دروُد و سلام
خَیَر اُمّت کی عظمتوں کی قسم !
حق و باطل میں اختلاط حرام
دینِ قیّم میں ٹاٹ کا پیوند؟
خام اذہان کا خیالِ خام !
آج گونجے فضاؤں میں تکبیر
مُنہ کے بَل آگرِیں نئے اصنام
نظریاتی حدُود پر حملہ ؟
جارحیّت کا ہَے یہ اِقدام
جَاھِدُوا فی سَبیْلِ رَبِّ عُلیٰ
رَبِّ کعبہ کا دین ہے اسلام
گامزن ہوگیا سوادِ عظیم
منزلِ شوق خود کرے گی سلام
جوشِ پیہم یقینِ مستحکم
لِلّٰہِ الحَمْد آج ہے ہر گام
فتحِ اسلام کی بشارت ہے
سُن صدائے شکستِ شیشہ و جام
فخرِ انسانیت ہے دینِ نبیؐ
اور ہم ڈھونڈ نے چلے ہیں نظام
جان دے کر ملی ہے آزادی !
کون ہے اشتراکیت کا غلام
دین دے کر جو دولتِ دُنیا
مل بھی جائے اگر مرے کس کام
ملّتِ محتشم کی شوکت سے
ہے عیاں آج شوکتِ اسلام
منفعل ہوگئی خِرد واصؔف !
منتہج ہو گیا ہے عزِم عوام !