میں قرآں پڑھ چکا تو اپنی صورت
میں قرآں پڑھ چکا تو اپنی صورت ہی نہ پہچانی
مرے ایمان کی ضد ہے مرا طرزِ مسلمانی
ہے صدیوں سے بسیرا مسندِ اَضداد پر میرا
مرے اعمال جامد ہیں ‘ مرے اقوال طوفانی
ارادے منفعل ہیں‘ آرزوئیں مضمحل میری
عدوئے ارتقا ہے میرے روز و شب کی یکسانی
عجب کیا ہے ‘ مجھے میرے مقاصد ہی سے اُکتادے
مرا ذوقِ خود آرائی ‘ مرا شوقِ تن آسانی
خدا اس پر بھی ‘ جانے کیوں ‘ افق پر مسکراتا ہے
قبائے شب سے جب چھنتی ہے صبحوں کی زرافشانی