وہ اُٹھ گیا کہ تکلّم تھا جن کا نعتِ رسول
وہ اُٹھ گیا کہ تکلّم تھا جن کا نعتِ رسول
وہ جن کی ذات پہ ہر دم تھا التفاتِ رسول
شجر پہ ذکرِ محمد کے عند لیب تھا وہ
اور اپنے لہجہ میں اِک منفرد ادیبؔ تھا وہ
لبوں پہ لفظ جو آئے وہ پھول بن کے کِھلے
چراغ جتنے جلائے وہ نعت بن کے جلے
لقد خلقنا الانسانَ کا جمال تھے وہ
مقامِ احسنِ تقویم کی مثال تھے وہ
مزاج ان کا ثنا گوئی ابتدا سے تھا
نصیب ان کو نسب آلِ مصطفیٰ سے تھا
وہ ڈھونڈا کرتے تھے الفاظ نعت کے پیہم
اب ان کو ڈھونڈیں گے الفاظ نعت کے ہر دم
پہن کے عشقِ محمد کا وہ لباس گئے
خدا کے گھر سے جو نکلے ، خدا کے پاس گئے