رات پوے تے بے درداں نوں
سُکھ دی نیندر آوے
تے درد منداں نوں تانگ سجن دی
اُو سُتیاں آن جگاوے
ہر ویلے تانگاں یار دیاں
بیٹھی رو رو کاگ اُڈاواں
پھالاں پاواں نی میں قاصد بھیجاں
مینڈا تھى گیا حال بیماراں
یار باہجوں ہُن جیون کوڑے
تے ہیں اندر درد ہزاراں
غلام فریدا میں تے روواں ایویں
او جیویں وچھڑی اے کونج قطاراں
آئی رات وصال دی یارب
آج سورج چڑھن نہ دیویں
واسطہ ای تینوں زلف ماہی دا
اے رات مُکن نہ دیویں
لگ گئی اے اکھ نال ماہی دے
ہن اکھ لگن نہ دیویں
اعظم دی اے پیاس ازل دی
اے پیاس نہ بُجھن نہ دیویں
ہُن آیوں ہُن آگیوں
تے میں جان نہ دیساں
جھلے کون ہجر دیاں ماراں
وچ جدایاں سال بیہا اے
جند رُل گئی وچ بازاراں
اِک اِک پل اِک سال دا گزرے
دس کینویں عمر گزاراں
اعظم باغ بہشت نہ بھاوے
مینوں بن ماہی بن یاراں
فیر رات پوے تے
بے درداں نوں
سُکھ دی نیندر آوے
تے درد منداں نوں
تانگ سجن دی
او ستیاں آن جگاوے
سر اُداس حیران کھلوتے
تے پیر زمین وچ گڈے
اڈیاں چُک چُک جھاتیاں مارن
متاں یار کتھوں سر کڈھے
یار جناں دے وچھڑ جاندے
تد روون او تھوڑا
روگاں وچوں روگ محمد
او جس دا ناں اے وچھوڑا
ہجر تیرا جے پانی منگے
تے میں خون ناں دے گیڑاں
او جی کردا اے تینوں سامنے بٹھا کے درد پرانے چھیڑاں
خش خش جنہاں قدر نئی میرا
میرے صاحب نوں وڈیائیاں
میں گلیاں دا روڑا کوڑا
محل چڑھایا سائیاں
فضل تیرے نال لوئے تر دے
پھٹیاں دے سنگ رل کے
کتے وی جنت جان محمد
چنگیاں دے سنگ رل کے
دنیا تے جس دُکھ نئی پایا
او کیوں آیا کیویں آیا
پُچھ بلال اویس دے کولوں
او کیویں یار منایا
اپنے یار دے بیلے وچوں
تمے چن چن کھائیے
ہور کسے دے باغے اندروں
او میوے لین نہ جائیے
عملاں والے لنگ لنگ جاندے
غافل غوطے کھاندے
ڈبن نہ دین محمد بخشا
او کامل پیر جنہاں دے
جے میں تینوں باہر ڈھونڈاں
میرے اندر کون سمانا
جے میں تینوں اندر ڈھونڈاں
فیر مقید جانا
سب کجھ توں ایں
سب وچ توں ایں
تینوں سب توں پاک بچھانا
میں بھی توں ایں توں وی توں ایں
ایتھے بلھا کون نمانا
مر مر اِک بناون شیشہ
مار پتھر اِک بھن دے
او دنیا تے ہن تھوڑے رہ گئے
قدر شناس سجن دے
دنیا اوتوں ٹر دے جاندے
قدر شناس سجن دے
عشق جنہاں دی ہڈی رچیا
فیر رونا کام انہاں
او مل دے وی روندے
تے وچھڑے وی روندے
روندے پھر دے راہاں
ککھ سواد نہ مصری اندر
ٹھنڈاں وی جگ ڈٹھیاں
پر ایناں ساریاں چیزاں نالوں
گلاں سجن دیاں مٹھیاں
سفنے دے وچ ماہی ملیا
تے میں گل وچ پا لئیاں باواں
او ڈر دی ماری آکھ نہ کھولاں
متاں فیر وچھڑ نہ جاواں
شام پئی میڈا شام نئی آیا
بن شاموں شام نہ بھاوے
شام ویلے واجاں شام نوں ماراں
جند شام شام کُرلاوے
آجا شاماں ہن پے گئیاں شاماں
گھر پنچھی وی مُڑ آئے
اوہ شام نصیباں والی ہوسی
جس شام نوں شام گھر آوے
میڈا دل وی توں
دلدار وی توں
میڈا غم وی توں
غم خوار وی توں
میڈا چین وی توں
تے قرار وی توں
میرا مان تران تے گھٹیا وٹیا
میڈا ونج بپار وی توں
میڈا ساز وی توں سامان وی توں
میڈا مان وی توں ارمان وی توں
میڈا سانول مٹھڑا شام سلونا
اتے مصحف تے قرآن وی توں
میڈاں درد وی توں درمان وی توں
میڈی جند وی توں میڈی جان وی توں
نالے نبیاں دا سلطان وی توں
نالے عرشاں دا مہمان وی توں
او میں تے مکدی گل مُکا دیواں
میڈا دین وی توں ایمان وی توں
شاعر کا نام :- نامعلوم