اکھّاں اگوّں آج اوہ اکھیاں دا تارا ٹر گیا
دل نوں چین آوے کویں دل دا سہارا ٹر گیا
پوترا سرکارؐ دا محبوب غوثِ پاک دا
خواجۂ ہند الولی دے دل دا پارا ٹر گیا
لاڈلا خواجہ فرید الدّین نظام الدّین دا
گولڑے والے دی محفل دا ستارہ ٹر گیا
کون دیوے گا تسلّی ہُن دل بے چین نوں
ہُندا سی جس در توں ہر اک دا گزارا ٹر گیا
جس دی خاطر اکھیاں ترسن اوہ نظر اوندا نہیں
خبرے ساتھوں رُس کے دلدار پیارا ٹر گیا
ساقیا آجا شرابی سہکدے نے دید نوں
فر آویں گا جدوں مے خوار سارا ٹر گیا
اعظؔم اُس دن توں نہ چنگی لگے چن دی روشنی
جہڑے دن توں یار دے رُخ دا نظارا ٹر گیا
شاعر کا نام :- محمد اعظم چشتی
کتاب کا نام :- کلیاتِ اعظم چشتی