کیسے کہوں کہ چاند ہیں تارے حسینؑ ہیں
ہیں ان سے بھی حسِین جو پیارے حسینؑ ہیں
ہیں فاطمہؑ کے لاڈلے شیر خدا کی جان
بحر وفا حسنؑ ہیں کنارے حسینؑ ہیں
نازاں ہے ان پہ خلد تو قربان ہے زمیں
میرے نبیؐ کے راج دُلارے حسینؑ ہیں
چشم فلک بتا کہیں ایسے ہیں خوبرو
گھر میں علی ؑ کے سارے کے سارے حسینؑ ہیں
بو سے مرے حضورؐ نے شہ رگ کے جو لیے
اشکوں کی داستاں کے اشارے حسینؑ ہیں
صوم و صلوٰ ۃ حکم خدا ہے یہی مجیدؔ
سمجھو کہ بس قرآن کے پارے حسینؑ ہیں
شاعر کا نام :- عبد المجید چٹھہ
کتاب کا نام :- عکسِ بو تراب