عالِم ظاہر و مَبطون اے امین و مامون
ساری عقلیں تِری مَمنون اے امین و مامون
جیسے قرآن ہے ، یونہی کتب سابقہ بھی
تھیں تِرے ذکر سے مَشحون اے امین و مامون !
بادشہ تیرے گدا ،فلسفی سودائی ہیں
حُسنِ عالَم تِرا مَجنون اے امین و مامون !
مدح خُو ہے تِرا ہر دم تہِ ظِلِّ رحمت
نقص جُو ہے تِرا مَلعون اے امین و مامون !
قبلِ تکمیل ہی مَعروض ہو مقبول ، اگر
ہو تِرے نام سے مَقرون اے امین و مامون !
ناسخِ جملہ شرائع ! تو رسولِ خاتَم
تا ابد ہے تِرا قانون اے امین و مامون !
صاحبِ کنزِ ثنائے کَفِ پا کیونکر ہو
طالبِ دولتِ قارون اے امین و مامون !
پہلے بھی نور چمکتا رہا تیرا، بن کر
کبھی یوسف ،کبھی ذُوالنّون اے امین و مامون !
جانِ عیسٰی ! ہے تِرے دَم سے بَہ نَصِّ قطعی
دور تعذیب کا طاعون اے امین و مامون !
تیری تالیفِ یَتَامٰی کے مخالف کےلئے
درس ہے سورۂِ مَاعُون اے امین و مامون !
مُنجیِٔ نوح ! تِرے اسمِ مسرّت کے طفیل
غم سے ناجی ہوا ذُوالنّون اے امین و مامون !
عظمتیں پائے معظمؔ سے لپٹ جائیں ، جو یہ
تیرے قدموں میں ہو مَدفون اے امین و مامون !
شاعر کا نام :- معظم سدا معظم مدنی
کتاب کا نام :- سجودِ قلم