اکھیاں وچ اتھرو آجاندے بَل پیندا غم تھیں سینہ ایں
جد پاک نبی دے عاشق نوں آجاندا یاد مدینہ ایں
اکھیاں دا ویہڑا وس پیندا پُتلی وچ سوہنا آ رہندا
اکھیاں دے تائیں روون دا آجاندا جدوں قرینہ ایں
رو رو کے مندا حال ہووے دل درداں نال نڈھال ہووے
جس ویلے چیتے آجاندا ذوالحج دا پاک مہینہ ایں
انج رہ کے دور مدینے توں سرکار دے شہر نگینے توں
مر جانا کاہدا مرنا ایں جی لیناں کاہدا جیناں ایں
مُڑ پھٹ پُرانے کھل گئے نے مڑ ہجر دے جھکھڑ جُھل گئے نے
ہنجواں نے میریاں اکھیاں دا مُڑ دتا ڈوب سفینہ ایں
جد ڈب ڈب تردیاں اکھیاں دی ہو گئی طہارت ہنجواں تھیں
اکھیاں دے اگے سوہنے دا آ گنبد گیا نگینہ ایں
کد صائم درداں مارے نے رب جانے شہر اوہ تکناں اے
جس شہر دے اندر اللہ دی رحمت دا کُل خزینہ ایں
شاعر کا نام :- علامہ صائم چشتی
کتاب کا نام :- کلیات صائم چشتی