چھڈ دُکھاں دا جہان چلو چلئے مدینے
جتھے لبھدی اَمان چلو چلئے مدینے
چلو چلئے مدینے جتھے ٹھنڈ پوے سینے
جتھے فیض دے خزینے جتھے نُور دے دفینے
جتھے رحمتاں دی کان چلو چلئے مدینے
چھڈ دکھاں دا جہان چلو چلئے مدینے
چلو چلئے مدینے جتھے روون دے قرینے
جتھے مہک ہے رچائی سوہنے نبی دے پسینے
جتھے ماڑیاں دا مان چلو چلئے مدینے
چھڈ دکھاں دا جہان چلو چلئے مدینے
چلو چلئے مدینے جتھے روضے دی بہار
جتھے دلاں دا قرار جتھے نبی تاجدار
ساڈا پاک مہربان چلو چلئے مدینے
چھڈ دکھاں دا جہان چلو چلئے مدینے
چلو چلئے مدینے ایتھے کوئی وی نئیں یار
ایتھے دکھ دین مار اوتھے سکھ بے شمار
صائم اوتھے دلدار چلو چلئے مدینے
چھڈ دکھاں دا جہان چلو چلئے مدینے
چلو چلئے مدینے جتھے دکھاں دا نہیں ناں
جتھے ٹھنڈ تھاں تھاں جتھے جنتاں دی چھاں
جتھے عالماں دی جان چلو چلئے مدینے
چھڈ دکھاں دا جہان چلو چلئے مدینے
صائم اتھرو بہاندے نالے پڑھدے درود
چلو چلئے مدینے چھڈ نام تے نمود
کاہدی جھوٹی آن بان چلو چلئے مدینے
چھڈ دکھاں دا جہان چلو چلئے مدینے
شاعر کا نام :- علامہ صائم چشتی
کتاب کا نام :- کلیات صائم چشتی