فہم و ادراک سے ماورا شان ہے

فہم و ادراک سے ماورا شان ہے

میرا آقاؐ تو نبیوں کا سلطان ہے

---

مثل سے ما ورا حسن تیرا شہا

خُلق تیرا تو سارا ہی قرآن ہے

---

سرورِ دو جہاں یہ محبت ترِی

جزوِ ایماں نہیں عینِ ایمان ہے

---

جانتا ہے تجھے سارا عالم مگر

جس نے مانا تجھے وہ مسلمان ہے

---

تیری ناموس پر اے شہِ انبیاءؐ

میرا تن میرا دھن سارا قربان ہے

---

میرے ملجا و ماوٰی !کرم کیجئے

غمزدہ اُمّتی تیرا ہلکان ہے

---

سبز گنبد کے صدقے ہرا کر اسے

میرا قلبِ حزیں دشتِ ویران ہے

---

قابَ قوسین و ادنیٰ میں اُمّت کا غم

عاصیوں پر یہ آقاؐ کا احسان ہے

---

بس حقیقت میں عارف وہی ہے جلیل

جس کو پیارے محمدؐ کی پہچان ہے