اوہ آقا کملی والا اے رب دا محبوب سداندا اے
اوہ جو آکھے مولا منّے جو چاہندا اے ہوجاندا اے
میں حِلم دی کیہہ توصیف کراں اوہدے خلق دی کیہہ تعریف کراں
دشمن وی در تے آجاوے لاہ چادر ہیٹھ وچھاندا اے
ہتھ دو جگ دی سرداری اے کملی دی بکل ماری اے
وسنیک خدا دے گھر دا اے غاراں وچہ نیر وگاندا اے
چاہوے تے چن نوں توڑ دیوے دل منّے سورج موڑ دیوے
آجاوے موج تے پتھراں نوں اپنا کلمہ پڑھواندا اے
کوئی کیہہ سمجھے کوئی کیہہ جانے اوہدا رُتبہ مولا ای جانے
جنہاں توں پتھر کھاندا اے اوہناں دی خیر مناندا اے
مخلوق اوہدی شیدائی اے در اُتے جھکی خدائی اے
میں وی آس ظہوریؔ لائی اے کد سوہنا کول بلاندا اے
شاعر کا نام :- محمد علی ظہوری
کتاب کا نام :- کِتھے تیری ثناء