سوال میرا نہ ٹال سائیں
غریب نوں کر نہال سائیں
بنا دے گلزار دل دی روہی
وسا کے ابرِ جمال سائیں
برات سو کے نیں دیندے ہو کے
خیال نوں تیری بھال سائیں
سنان اَدّھی صدی دے قِصّے
غلام دے چٹےّ وال سائیں
نہ ویکھ اندر مرے دی کا لکھ
توں لج تعلق دی پال سائیں
تری نظر دا چرو کا طالب
فقیر دا مندا حال سائیں
سکون برباد ہویا دل دا
زمانے چلّی اوہ چال سائیں
کدروتاں دا اے راج تھاں تھاں
محبتاں دا اے کال سائیں
ترے کرم دی کراں شکایت
مِری ایہہ کتّھے مجال سائیں
مَیں ڈگ پیا ہوندا مدتاں دا
جے توں نہ رکھدوں سنّبھال سائیں
توں مان بے وس دا بے ہنر دا
توں بے نوا دا بھیال سائیں
کدی نہ دبیا مَیں ظلم کولوں
تری حمایت سی نال سائیں
کراں جے گل تیریاں عظمتاں دی
لیا واں کتھوں مثال سائیں
جیب ربّ دا اے کون تیں بن
ہے ختم جس تے کمال سائیں
وکھا دے اُمّت نوں مُنہ خوشی دا
گزردے جاندے نیں سال سئیں
شاعر کا نام :- حفیظ تائب
کتاب کا نام :- کلیاتِ حفیظ تائب