مسافر مدینے دا راہی عرب دا ہے دیدار روضے دا پاون لئی چلیا
ایہہ سوہنے نبی مصطفے دا دیوانہ ہے آقا نوں دکھڑے سناون لئی چلیا
جدوں ہوئی آقا میرے دی حضوری تدوں ہوونی ایں تمنا پوری
ایہہ چم چم کے روضے دی جالی اوہ نوری ہجر والی آگ نوں بجھاون لئی چلیا
ایہہ دیکھے گا جا کے اوہ پیاریاں تھاواں جتھے رہن ہر ویلے لگیاں بہاراں
جتھے اون قدسی وی بن بن قطاراں اوہ اکھیاں نوں جلوے دکھاون لئی چلیا
پھرے گا جدوں وچ مدینے دیاں گلیاں تے کھل جانیاں سبھے دلدیاں کلیاں
جیہڑی جاتے لائیاں محمد نے تلیاں اوتھے سیس اپنا جھکاون لئی چلیا
اوہ دھرتی وی عالی جتھے وسدا دو جہاناں دا والی
دو عالم جیہدے ہین در دے سوالی اوتھے اپنی قسمت بناون لئی چلیا
کھلو دے گا جد باب رحمت چہ جاکے ایہنوں رحمتاں گھیر لبناں ایں آکے
مدینے شہر دے مسیحا دے در تے ایہہ سب روگ اپنے گواون لئی چلیا
محمد دا دربار بلے بئی بلے جتھوں ملدے رحمت دے سودے سولے
جتھے موجاں لٹدے نے کملے تے جھلے ایہہ وی ناواں اوتھے لکھاون لئی چلیا
پیام اج ایا اسے سرکار کولوں رہائی ملی غم دے آزار کولوں
نیازی دو عالم دے مختار کولوں ٹکٹ جنتاں دی کٹاون لئی چلیا