ہر جگہ رحمتوں کا نشاں آپؐ ہیَں
ہر کڑی دھوپ میں سائباں آپؐ ہیَں
سدرۃ المنتہیٰ تک قدم آپؐ کے
کیا وہاں کوئی پہنچے جہاں آپؐ ہیَں
میرے دل پر کوئی راج کیا کر سکے
میرے دل کے تو بس حکمراں آپؐ ہیَں
خالقِ دو جہاں نے یہ فرما دیا
میرے محبوب ! فخرِ جہاں آپؐ ہیَں
کہہ رہی ہے ہوائے مدینہ یہی
میری خوشبو میں ہر دم رواں آپؐ ہیَں
آپؐ کے دَم سے ہے روشنی کا سفر
ہر اُجالے کے اندر نہاں آپؐ ہیَں
سامنے ہے دُکھوں کا سمندر تو کیا
غم نہیں ، غم نہیں ، مہرباں آپ ہیَں
ہر گھڑی ، ہر زماں ، ذکر ہے آپؐ کا
ہر گھڑی آپؐ ہیں ، ہر زماں آپؐ ہیَں